Schrrrumm! Ald widder en Fleeg kapott!

Wat eß dat em Summer - e Leid un 'ne Kummer,
Mer hät met de Fleege zo dun,
Oem die zo verjage - kapott se zo schlage
Sin Lück, die verstonn do jet vun.
Der Franz zeig si Kläuche - un säht för sie Fräuche,
Wat bruche mir Fleegepapeer,
Ich schlonn met d'r Hand se - direck an de Wand se
Dat klatsch, un et mäht och Pläseer!

Schrrrumm! - Alld widder en Fleeg kapott,
Schrrrumm! - Alld widder ein dut,
Dun mir vum schlagen de Aerme och wieh
Hück geiht et besser wie gester - Marie,
Schrrrumm! Alld widder en Fleeg kapott,
Schrrrumm! Nit lang et mie doht,
Dann kläv zum Vergnöge - de Wand schwazz voll Fleege,
Schrrrumm! Dat Dinge eß goht.

Et weiß jeder einer - et eß nix gemeiner,
Nix schläächter, als grad wie en Fleeg
Et nötz gar kei flooche - se setzen om Kooche
Bahl he un bahl doh em Geseech,
Op Nase, op Plaate - op Quätsche un Taate,
Do sööken se Plääzger sich uhs.
Dröm künnt ihr se packe - dann schloht en der Nacke
Die Oehster - un roft durch et Huhs:

Schrrrumm! Alld widder en Fleeg kapott usw.

Nit jeder dä kann er - ich selver, ich hann et
Probeet, - wenn mer schlage se well,
Dat eß fies geloge - sie sin fott gefloge
Zum schlonn hält en Fleeg doch nit stell.
Sollt für üch ein setze - dann doht doch benötze
Wenn einer Talent doför hät,
Un haut doch met Ihfer - dat Fleegegeziefer,
Et klatsch un et singk sich su nett:

Schrrrumm! Alld widder en Fleeg kapott usw.