Nä – ich mag Dich nit mie

Wenn mer drei Johr zosamme es jejange,
anenander hät jehange wie en Klett,
wenn e Päärche, mie kann mer nit verlange,
sich op ewig de Treu jeschwore hät,
un et kütt dann op eimol jet dozwesche,
wat dann kütt, dat es jewöhnlich janz bedröf,
stundelang do weed jeschannt un och jekresche,
un zum Schluss do heisch et dann em Abschiedsbreef:

Nä, ich mag dich nit mie, un ich well dich nit mie,
do häs jo mem Leienard zo dun.
Treu wie Jold wors do Ohs, wo de jings, wo do sohs,
ävver jetz es dat Schönste dovun.

Häs do als Mann vor lauter Lieb der Dalles,
mööchs dich vör ding eije Dommheit selvs zerschlonn,
wenn als Bräutijamm do herjejevven alles,
för ding Braut bes op et Hemb dich uhsjedonn,
un do sühs et dann op eimol met enem andre,
die jeschenkte Similis die loss im stell,
loss et laufe, loss et sause, loss et wandre,
sag im, wenn et widder zärtlich wäde well:

Nä, ich mag dich nit mie, un ich well dich nit mie...

Dröm ihr Mädcher, dat eine loht üch sage,
sitt vernünftig, denn die Männer sin hück rar.
Wenn ihr eine hat, dann halt in fass am Krage,
dat donevvejonn dat wehd mer schnell jewahr:
Es dä Mann en üch och noch su ärg verschosse,
bei Jelejenheit hä revancheet sich schon:
Wann ihr kutt, dann es de Huhsdör avjeschlosse
un zum Abschied röf hä bovve vum Balkon:

Nä, ich mag dich nit mie, un ich well dich nit mie...