Mama! Mama! unse Heinemann

Dä Heinemann es laut am kriesche, hä häld sich ald stundenlang dran.
Wo hät dann dä Klein dat Wiewieche? Et jeiht op der Namensdag ahn.
Dann well mer doch jähn jet geschenk han un weil su Jedöns hä dröm mäht,
dröm läuf sing jeck Schwester natürlich direk bei de Mutter un säht:

Mama, Mama, unsen Heinemann,
dä well zom Namenstag e Schöckelpädche han.
Mama, Mama, wenn et Freud ihm mäht,
dann jangk nohm Tieze Leienard
un kauf däm Jung dat Pähd!

Die Kinder han jähn ihre Welle, dä ein well en Lokomotiv,
dä andre en Popp un e Zemmer, en Öffche en Pann un en Riev.
Do well unsen Klein nix vun wesse, dä well jet zo schöckelen han.
Hä es op dat Pähd janz versesse, dröm halden se all för ihn ahn:

Mama, Mama, unsen Heinemann,...

Mer hät doch e Leid met dä Blage, ja, wenn die Valuta nit wör,
dä Jung es mem Bömmel beschlage, et es doch hück alles su dhör.
Dä Put brängk mich janz durchenander, kaum dat mer de Auge opmäht,
dann höht mer kein Thema, kein ander, als wie vun däm lausije Pähd.

Mama, Mama, unsen Heinemann,....

Ich well üch jetz all ens jet sage, dä Jung deiht em Stelle mir leid.
Denn kritt mer ne Wunsch avjeschlage, dann weiß mer als Kind wie dat deiht.
Mer künne vielleich jet erreiche, dröm nor nit jeziert un jezaut,
die Ahl lieht sich secher erweiche, mer singe jetz leis un dann laut:

Mama, Mama, unsen Heinemann,...