De Kallendresser
Sie sind hier: Startseite » Ostermann » Alle Ostermann-Titel

Jet vum Bier


Vill vum Wing weed jestrunz, dat weiß jeder vun uns.
Keine Dichter verjiss in em Leed,
jede Sänger dä singk jet vum Wing unbedingk,
weil et schließlich sich och su jehööt!
Ävver wenn mer wie he kritt direck vum Büffee,
fresch vum Fass, hell un dunkel serveet,
un et schmeck dann wie Taat, es e Lob angebraht,
doröm rofe mir all unschineet:

Kellner! Hier! Hier! Hier! Noch en Bier! Bier! Bier!
Op Wing un Seck hück, do blose mer jet,
et weed jetz nix anders wie Bier nur jepött.
Kellner! Hier! Hier! Hier! Noch en Bier! Bier! Bier!
Mer meine mir möhte, mer blieve am Tröte
dat Bier! Bier! Bier!

Jede Kenner dä flüch janz bestemmb op dat Züch
wie en Möck op en Bogenlamp ahn.
Ehztens schmeck et su jot, un et jit neue Mot,
wenn mer ahnfängk, dann hält mer sich dran.
Och su manch ahlem Stätz weed et wärm öm et Hätz,
im noch schneller wie fröher et schleit.
Loss un Freud mäht der Saff, doröm singk hä met Kraff,
jo, dat heiß, wenn et ävvens noch jeiht:

Kellner! Hier! Hier! Hier! Noch en Bier! Bier! Bier!...

Wer sich nit dran erwärmb, un für Bier jar nit schwärmb,
wem dat lecker Jesöffs he nit schmeck,
dä es mieh och nit wäht, dat mer einfach im säht:
Jangk noh Huhs un suff Wasser, do Jeck.
Denn et mäht widder jung un brängk alles en Schwung,
stell der Arnold si Züffje anloht,
en die blaue Äujelein un säht: Drink der noch ein,
denn mer weiß nit, wofür dat es Jot!

Kellner! Hier! Hier! Hier! Noch en Bier! Bier! Bier!...