De Kallendresser
Sie sind hier: Startseite » Ostermann » Alle Ostermann-Titel

Chrestian, du beß ’ne feine Mann!


Wat sich dä Schmitze Chress jemaht, dat es jo rein zo doll,
dä läuf eröm, et es en Staat, die janze Stadt es voll.
Hä trick am Dag sich zweimol öm, Kamasche, weiß wie Schnee,
die hänge öm de Fööss eröm, hä hät de Täsch voll "he".
Sing Anzög sin vum "Pins & Co,", hä dräht nix vun de Stang,
Zijare, zwanzig Mark et Stöck, die rauch dä Chress ald lang.
Ich weiß nit, wie dä Kähl dat mäht un weil op singer Aat
hä immer stats es wie e Päd, han ich im letz jesaht:

Chrestian, do bes ne feine Mann,
do häs Talent, do bes ne "Jent",
do häs jet öm un ahn!
Chrestian, do küss su fein eran,
sag, unger uns jesaht, do muss doch Millione han!
Chrestian, et jeiht mich jar nix ahn,
doch sag ens ahn, du halven Hahn,
wie küss du blos do dran?
Chrestian, do bes ne feine Mann,
du bes dä Mann, dä sich jet leiste kann.

Dä "schöne Lehmann" seiner Zeit, wenn dä vum Dud op stünd,
dä wör noch jäje unse Chress et reinste Waisekind.
Em Knoploch fählt et Blömche nie, och dräht hä nur Glace,
för jedes Mädche deiht hä av d'r Hot bes ahn de Knee.
Fröh'r maht hä met d'r Wohzelböhsch sich Näl un Finger rein,
hück muss hä zweimol en d'r Woch zum Maniküren sein.
Su jeiht dat schon die janze Zick, et Jeld wäht janit all,
ich weiß et rofe bahl die Lück wie ich op jeden Fall:

Chrestian, do bes ne feine Mann,...

Die kölsche Sproch es ordinär, die sprich d'r Chress nit mie,
hä kütt sich vör hück wie nen Här der Aristokratie,
un kütt hä en en Bar erenn, dat Publikum et jauchz,
denn jedesmol bestellt d'r Chress en "Schateau Margaux":
Ein bischen schnell, sie Flabes; sie "Tut switt" do stieve Penn.
Dä Kellner lach, un denk sing Deil un stich et Drinkjeld en.
Die Schrammelmusik weiß Bescheid, kein Wunsch bleibt unerfüllt,
dä Chress am mihzte jevve deiht, wenn alles singk un spillt:

Chrestian, do bes ne feine Mann,...